'शान्ति र संविधानका पक्षमा लचिलो निर्णय लिन्छौं’

पालुङटार, गोरखा-, मंसिर १० - माओवादीले संविधानसभाको थपिएको समयावधि जेठ १४ सम्मका लागि संक्रमणकालीन कार्यदिशा बनाउने भएको छ । भावी कार्यदिशाबारे विवाद भइरहेको बेला उसले 'संक्रमणकालीन कार्यदिशा' ल्याउन लागेको हो ।

केन्द्रीय कमिटीको जारी छैटौं विस्तारित बैठकमा भावी कार्यदिशाबारे अध्यक्ष पुष्पकमल दाहाल, उपाध्यक्षद्वय मोहन वैद्य र बाबुराम भट्टराईद्वारा प्रस्तुत तीन दस्तावेजमा समान देखिएका विषय समेटेर संक्रमणकालीन कार्यदिशा बनाउन लागिएको हो ।

'अहिलेको राजनीतिक गतिरोधलाई सम्बोधन गर्नेगरी संविधानसभाको थपिएको समयावधिसम्मका लागि संक्रमणकालीन कार्यदिशा बनाउनेबारे शीर्ष नेतृत्वबीच अनौपचारिक सहमति बनिसकेको छ,' अध्यक्ष निकट स्थायी समिति सदस्य वर्षमान पुनले बिहीबार बेलुकी कान्तिपुरसित भने, 'नेतृत्वमा तत्कालीन कार्यदिशाबारे खासै ठूलो अन्तर छैन । प्रधान अन्तरविरोधबारेका सामान्य असहमतिलाई थप बहसमा लैजाने गरी थाती राखिन्छ ।'

उपाध्यक्ष मोहन वैद्यपक्षधर स्थायी समिति सदस्य नेत्रविक्रम चन्दले पनि शीर्ष नेतृत्वले यो बैठक सकिनुअघि नै भावी कार्यदिशाबारे एउटा निर्णय लिने जनाए । 'सबैका सहमति जुटेका विषय समेटेर तत्कालीन खालको कार्यदिशा बनाउने विषयमा शीर्ष तहमा छलफल भइरहेको छ,' उनले भने । स्थायी समितिको आगामी बैठकले यसबारे निर्णय लिनसक्ने उनले जनाए । संविधानसभाको नारा उठाएको र त्यसका लागि ठूलो बलिदानी दिएकाले शान्ति र संविधानकै कार्यदिशामा पार्टी अघि बढ्नुको विकल्प नरहेको भट्टराई पक्षधर स्थायी समिति सदस्य टोपबहादुर रायमाझीले जानकारी दिए । 'शान्ति प्रक्रियालाई निष्कर्षमा पुर्‍याएर जनताको पक्षमा संविधान लेख्ने वातावरण बनाउन जनदबाब, संघर्षका कार्यक्रम तय गरिनेछ,' उनले भने ।

माओवादीले संविधानसभाको बाँकी अवधिसम्म शान्ति र संविधानमै जोड दिने र त्यसलाई असफल पार्न खोज्नेविरुद्ध संघर्षका कार्यक्रम पनि गरिराख्ने भएको हो । 'नेताहरूलाई शान्ति र संविधानमा जोड दिन लगाउने खालको नीति बनाइनेछ । सँगसँगै २५ हजारभन्दा बढी पूर्णकालीन र हजारौं कार्यकर्तालाई काम दिन तथा जनपक्षीय संविधान निर्माणका लागि दबाब दिन संघर्षका कार्यक्रम पनि तय गरिनेछ,' एक शीर्ष नेताले भने । माओवादीको स्थायी समितिको बैठक बिहीबार पालुङटारमै बस्दैछ । त्यसअघि तीन शीर्ष नेता बसेर संक्रमणकालीन कार्यदिशाबारे एउटा सहमति गर्ने र त्यसलाई स्थायी तथा क्रमशः अन्य कमिटीबाट अनुमोदन गराइने स्रोतले बतायो । विस्तारित बैठकको बिहीबार बेलुकीसम्मको छलफलमा माओवादीका विभिन्न राज्य समितिसहित ३० समितिका ९२ जनाले अध्यक्ष र दुई उपाध्यक्षद्वारा प्रस्तुत दस्तावेजमाथि आ-आफ्नो सुझाव प्रस्तुत गरेका थिए ।

विस्तारित बैठकको शुक्रबारको छलफलमा केही स्थायी समिति सदस्यले आफ्नो धारणा राख्ने र त्यसपछि उपाध्यक्षद्वय वैद्य र भट्टराईले आफ्ना दस्तावेजमाथि उठेका प्रश्नको जवाफ दिनेछन् । सबै दस्तावेज र बैठकमा सहभागी प्रतिनिधिसमेतका सुझाव र प्रश्न सम्बोधन हुनेगरी अध्यक्ष दाहालले शनिबार प्रष्टीकरण दिनेछन् । त्यसपछि दस्तावेजहरूको संश्लेषण गरी तत्कालीन संक्रमणकालीन कार्यदिशा प्रस्तुत गर्नेछन् ।

त्यसपछि शनिबार दिउँसो नै सभा गरी बैठक टुंग्याउने माओवादी सोच छ । 'सहभागीको थकानका कारण बैठक छिट्टै टुंग्याउने तयारी भइरहेको छ । हामी यो बैठक लम्ब्याउने पक्षमा छैनौं,' स्थायी समिति सदस्य तथा प्रवक्ता दीनानाथ शर्माले भने ।