विश्वकप आयोजना गर्न नदिएपछि ओबामा रिसाए

वासिङ्टन, मंसिर २१ (एजेन्सी)- अमेरिकी राष्ट्रपति बाराक ओबामाले २०२२ को विश्वकपको आयोजना अधिकार अमेरिकाको बदला कतारलाई दिने फिफाको निर्णय त्रुटिपूर्ण भएको बताएका छन्।


अमेरिकी फुटबल महासंघले आयोजनाको प्रस्तावका लागि लाखौं डलर खर्च गरेको थियो। यसअघि अमेरिकाले १९९४ मा विश्वकप आयोजना गरेको थियो।
ओबामाले भने, 'मेरो विचारमा फिफाको यो निर्णय त्रुटिपूर्ण छ।'


सन् २०१८ को विश्वकप आयोजनाको दाबेदार बेलायतले पनि यस फैसलाको आलोचना गर्दै फिफाले आफ्नो वाचा पूरा नगरेको बताएको छ। अर्कोतर्फ यस घोषणापछि कतारमा उत्सव मनाइँदैछ।


हजारौंको संख्यामा कतारका मानिस र त्यहाँस्थित विभिन्न एसियाली देशका कामदार दोहामा झन्डा र भुभुजेला लिएर सडकमा निस्किएका थिए।


पहिलो पटक मध्यपूर्वको कुनै देशलाई फुटबल विश्वकपको आयोजनाको अवसर दिइएको छ। यसबाट मध्यपूर्वमा फुटबलको विकासमा टेवा पुग्नेछ। रुसलाई सन् २०१८ को विश्वकपको आयोजनाको अधिकार प्राप्त भएको छ।


यस घोषणालगत्तै रुसी प्रधानमन्त्री भ्लादमिर पुटिनले आफू स्विट्जरल्यान्डको सहर जुरिचस्थित फिफाको मुख्यालय गएर सबैलाई धन्यवाद ज्ञापन गर्ने बताएका छन्।


यस आयोजनाका लागि रुसले नेदरल्यान्ड्स-बेल्जियम, स्पेन-पोर्चुगल र इङ्ल्यान्डलाई हराएको थियो।


अमेरिकाको आयोजना अभियानका लागि पूर्वराष्ट्रपति बिल क्लिन्टन पनि सक्रियताका साथ लागिपरेका थिए र उनी अन्तिम प्रस्तुतिमा पनि सामेल थिए। त्यसक्रममा अमेरिकाले लाखौं डलर खर्च गरेको थियो।